Kama sio utumwa ni nini hiki?

Habari za siku ndugu msomaji. Binafsi sijambo. Nafurahi kurejea kibarazani baada ya heka heka za huko na huko. Itoshe kuhusu mimi, nikukaribishe tena humu ndani.

Leo ningependa kukusimulia kisa kimoja. Nikuase kwanza, kwamba usilazimike kunielewa vibaya. Sijawa na tabia ya kuona makosa zaidi niwapo mahali ama nikutanapo na watu. Maana siamini kwamba binadamu ana kazi ya kushabikia makosa kuliko jema moja. Nisijitetee sana.

Jumapili hii nilipata fursa ya kuhudhuria ibada kwenye kanisa la 'kisomi'. Washirika wa kanisa hili, wengi wao ni wale ambao umande haukuwazuia kuhudhuria shule. Wamesoma. Pamoja na ukweli kwamba wote walikuwa weusi kama mimi, lakini ilikuwa bayana kwamba kiingereza kilikuwa 'nguzo' ya ibada hiyo. Hilo halikuwa tatizo kwangu. Maana inaeleweka kwa wengi wetu kwamba, kusoma kunathibitishwa na umahiri wa kusema kiingereza. Nshazoea hili. Pamoja na ukweli kwamba kiuhalisia kiswahili ndicho kinachotawala madarasani lakini watu hatutaki kuukubali ukweli huu. Wanafunzi tunadiskasi kwa kiswahili hata kama viandikwa vyote viko katika kiingereza. Lakini inashangaza waugwana bado wanabishana kuhusu ni lugha ipi ya kutumia katika elimu!

Basi bwana. Ibada iliendeshwa kwa kiingereza na akawepo mtu wa 'kutusaidia' kwa kiswahili. Hiyo haikuwa tabu hata kama hakuwepo hata mmoja asiyejua kiswahili.

Wakati wa mahubiri, mchungaji alitumia kiswahili fasaha. Katika hali ambayo sikuitegemea kabisa, akawepo 'msomi' mwingine wa kutusaidia kwa kiingereza! Sasa nilichoshindwa kukibaini ni ulazima hasa wa mtafsiri huyu wa pili. Hivi kama wasikilizaji wote wanaelewa kiswahili, kuna sababu gani ya kutusaidia tena kwa kiingereza?

Mfasiri wetu si tu kwamba alikuwa fundi wa kutengeneza ujumbe wake mwenyewe, lakini alinifanya nishindwe kuumeza sawa sawa ujumbe wa mchungaji Jumapili hiyo. Nilibaki kushangaa namna 'uharibifu' ule ulivyoruhusiwa nyumbani mwa Mungu bila sababu ya maana. Bado nashangaa. Sababu ujumbe wenyewe siku hiyo ulihusu 'kukombolewa kutoka kwenye vifungo vya giza'. Nisaidie kuelewa kwamba tafsiri zile zisizo za lazima si aina fulani ya kifungo cha fikra.