Unahusianaje na nafsi yako?

Huwa unajisikiaje ukijitazama kwenye kioo? Unaridhika na sura unayoiona? Vipi ukiangalia picha zako za hivi karibuni? Unaridhika na ulivyo? Umbo lako? Mtindo wa nywele zako? Rangi ya ngozi yako? Unajionaje?

Watu wengi tunapata shida sana kujikubali. Hatujipendi. Kila tunapojitazama, tunaona kasoro. Wachache wetu huziona kasoro hizo kama vitu vidogo visivyotupa tabu sana. Mtu aweza kujiangalia kwenye kioo, akaona kasoro ndogo, lakini akajipa moyo: "Ngoja nichane, nitapendeza". " Ngoja niende saluni, nikabadili mtindo". Akaziona kasoro na zisimsumbue.

Lakini wengi wetu huvunjika moyo kwa kudhani/amini kuwa kasoro hizo hazirekebishiki. Pengine rangi ya ngozi si nyeupe vya kutosha. Ama umbo letu halivutii, na mambo kama hayo. Kuvunjika moyo kwa namna hiyo, husababisha kujengeka kwa hisia hasi kuhusu nafsi ya mtu mwenyewe.

Jambo moja kabla hatujaendelea: Mahusiano mema na nafsi zetu hutokana na vile tujichukuliavyo. Mahusiano mabaya na nafsi zetu husababisha kujidharau, aibu, na hata kujichukia. Vilevile, mahusiano mazuri na nafsi zetu, huleta kujiheshimu binafsi, kujikubali na kujipenda. ( Kwa bahati mbyaa watu wengi tunayo mahusiano mabaya sana na nafsi zetu wenyewe, ingawa tunajitahidi sana kuhusiana vyema na nafsi za watu wengine)

Na ili kubaini vile tunavyojichukulia wenyewe, ni muhimu kufanya uchanganuzi wa namna tunavyojichulia sisi wenyewe, na namna tunavyohisi tunaonwa na wengine.

Tunavyojichukulia hutokana na vile tunajiona (iwe kupitia kioo, picha nk) na pia vile tunavyoamini tunaweza kufanya mambo fulani kwa ufasaha. Na ilivyo, ni kwamba matokeo ya kwanza tunayoyapata kupitia majaribio yetu, huwa na athari kubwa ya namna tunavyojichukulia. Mfano kijana, kwa mara ya kwanza, anampenda binti, anaanza harakati za kumshawishi awe rafiki yakle. Binti huyo " akimtolea nje", kijana huyo huweza kuvunjika moyo kiasi cha kuweza kujenga chuki na nafsi yake mwenyewe ikifuatiwa na uadui wa kudumu na viumbe hao wa kike, hasa kama matokeo ya jinsi hiyo yatamtokea kwa mara ya pili.

Hivyo, jinsi tunavyopata matokeo tuliyoyatarajia, ndivyo tunavyojenga kule kujisikia vizuri; matokeo tusiyoyatarajia yanapojitokeza mara kadhaa, ndivyo tunavyojenga mahusiano mabaya na nafsi zetu wneyewe.

Tunaweza kubaini tuonwavyo kwa kutathimini mwitikio kutoka kwa wengine ( hasa tunaowaheshimu). Watu wakitusema vizuri, mara nyingi tunajisikia watu wa maana. Tunapata changamko la nafsi. Ndio maana mara nyingi huwa rahisi sana kukubali sifa (hata zile zinazoitwa za kijinga), kuliko udhaifu wetu unaposemwa.

Hata hivyo mambo haya, kama nilivyopata kusema, yana hirizi yake katika maisha ya familia. Kama ulibahatika kuwa na wazazi wanakuosema vizuri, wanaonyesha kukujali, kwa kiasi kikubwa utakuwa mtu mwenye mahusiano bora na nafsi yako. Lakini kwa wale tuliozaliwa katika mikiki miki, bila shaka tuko kimikiki miki vivyo hivyo.

Kwa kuwa kuifahamu nafsi yako ni wajibu wako mwenyewe, nikupe kazi ifuatavyo:

1. Unajionaje?

Chukua karatasi, jielezee unavyojiona. Mwingine anauliza: Nijielezee? Ndio. Orodhesha ujuzi, uwezo, ufahamu, wasifu na kila kizuri unachodhani unacho. Mfano waweza kusema: " Nina uwezo mzuri katika (eneo hili)..." " Ninaujuzi (huu)...." Kwa lugha rahisi ifagilie nafsi yako kadiri uwezavyo. Hiyo insha itakayotoka hapo, itakuwa inaeleza namna unavyojiona mwenyewe, self-concept, kwa lugha ya msisitizo.

2. Wengine wanakuonaje?

Tathmini mahusiano yako na watu wengine. Angalia wanapohusiana nawe huonekana kuamini wanafaidi kipi cha maana. Halafu fanya vile vile ulivyofanya katika (1) hapo juu, lakini sasa jieleze, watu wengine wanaona nini kwako. Sentensi zako zianze na: " Watu wengine wanaamini nimejaliwa..." " watu huniafuata kujua (hiki na hiki)..." Andika mengi kama uwezavyo.

Maelezo yako hayo yatakupa picha ya wewe ni nani, self-perception, kwa msisitizo.

Maoni

  1. Bila jina2/1/08 11:27 AM

    Heri ya mwaka mpya!
    Ni kweli kabisa wengi wetu huwa hatuchunguzi au kuzikagua nafsi zetu hata mara moja kwa mwaka. Hali hii husababisha wengi wetu kutokujipenda hata kidogo na kushindwa kabisa kuwapenda wengine.Tunasahau kabisa kuwa sisi binadamu ni wajibu wetu wa kwanza ni kujipenda sisi wenyewe na kuzikubali kasoro au mapungufu tuliyonayo,zipom kasoro ambazo zinaweza kurekebishika na zingine haziwezi kabisa kurekebishika.Sasa ni wajibu wetu kama alivyosema Bwaya ukichukua karatasi na kalamu ukarodhesha maeneo ambayo unayamudu na maeneo ambayo hujamudu iatkuwa rahisi sana kwako kujitambua nafsi yako na kuwaelewa wengine. wengi wetu tumezoea kuona kasoro za wenzetu wakati zetu hata hatuzijui.Tutenge muda wa kuzichunguza nafsi zetu.

    JibuFuta
  2. Christian Bwaya6/1/08 10:08 AM

    Nuru,

    Heri ya mwaka mpya na wewe. Ninathamini sana mchango wa mawazo kama yako.

    Nimegundua kuwa unayo mambo makubwa ambayo inabidi yasiishie tu kwenye kisanduku cha maoni. Yasibaki kwenye barua za wasomaji.

    Ningependa kusoma mawazo yako, na wasomaji wengine kuhusu namna ya kuchukuliana na udhaifu usiorekebishika ambao twaweza kukutana nao katika kujichunguza. Nini cha kufanya?

    Hilo ndilo nilililotaka kuligusia baada ya hili. Naamini mawazo ya wasomaji kama wewe, yatakuwa muhimu katika hoja hiyo inayofuata. Karibu.

    JibuFuta
  3. Bila jina10/1/08 10:16 AM

    Nashukuru kwa kuthamini mchango wangu.
    Kwa jinsi ya ufahamu wangu nakubaliana na wewe kama mtu ukijichunguza kwa makini utagundua kuna sehemu una udhaifu.Sasa namna ya kukabiliana na huo udhaifu kwanza ni kukubali kuwa unaudhaifu au mapungufu, kinachofuta baada ya kukubaliana na huo udhaifu ni kuangalia upande mwingine au upande mzuri wa huo udhaifu.Labda nitoe mfano kidogo unaweza ukawa una udhaifu wa kukasirika mara kwa mara,sasa badala ya kuangalia upande mbaya wa hasira zako kuwa una waudhi watu basi lichukulie suala hilo ni kama huwa haupendi watu waingilie mipaka yako vilevile ili uwe binadamu kukasirika ni sehemu muhimu ya maisha.Pia Mkuu Bwaya hakuna katika maisha kitu kisichorekebishika ila ninavyofahamu mimi kuna kuamua kutokujirekebisha. Ni kama vile tunavyoamua kucheka au kukasirika. kwa hiyo pia kuna suala la maamuzi.Je ni rekebishe udhaifu wangu au la.

    JibuFuta

Chapisha Maoni

Zilisomwa zaidi wiki hii...

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi
Soma zaidi »»

Tumia Mbinu Hizi Kuelewa Unachokisoma -3

Picha
PICHA: thesouthern.com Siku moja nikiwa kwenye maktaba ya Chuo Kikuu cha Dar es Salaam, wanafunzi wa shahada za awali waliingia kufanya mtihani wa muhula wa mwisho wa masomo. Wakati wanaingia, mmoja wao alijigamba kwamba hiyo ndiyo ilikuwa mara yake ya kwanza kukanyaga maktaba tangu amejiunga na chuo hicho miaka mitatu iliyopita. Nilishangaa inawezekanaje mwanafunzi wa chuo kikuu kujisifia jambo la fedheha kama hilo.
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye
Soma zaidi »»

Zijue Tabia Nne za Kiongozi Bora Kazini

Picha
Ufanisi kazini, kwa kiasi kikubwa, unategemea uwezo alionao kiongozi. Huyu ni mtu mwenye mamlaka yanayompa sauti ya kuhamasisha watu kujiwekea dira na utaratibu wa kuifikia dira hiyo. Kiongozi anatambulishwa na uwezo wake wa kuwavuta na kuwashawishi watu makini kutumia vipawa , ujuzi na uzoefu walionao katika kuwezesha kufikia malengo mapana ya kampuni, taasisi au kikundi husika.
Soma zaidi »»

Tabia za Mtoto wa Miaka 0 – 3 Kimahusiano na Kihisia

Katika makala yaliyopita , tuliangalia matukio muhimu ya kimakuzi katika maeneo mawili makubwa ya ukuaji wa mtoto nayo ni 1) kimwili na 2) kiakili. Katika sehemu hii ya pili, tunasaili ukuaji wa kimahusiano na kihisia ili kutazama yabia zinazojitokeza pasipo kuathiriwa na malezi na haiba ya wazazi. Kwa lugha nyingine, haya ni matarajio ya mtoto yanayoendana na umri wake bila kuingiliwa na matarajio na yanayofanywa na mzazi kwake.
Soma zaidi »»