Rariki yangu Rama muuza magazeti

Kazi ya kwanza niliyoifanya baada ya kufika Singida ni kulazimisha matangazo ya blogu zetu. nimekuwa nikibadili 'settings' kwenye kila kompyuta niliyoitumia kwa kubadili 'home page' iliyopo kuwa blogu moja wapo kati ya nyingi tulizonazo watanzania. Nimebadili badili baadhi ya kopyuta na mpaka sasa kuna kama blogu kumi hivi kama home page. Kwahiyo, kama inavyotarajiwa, kila mtumiaji wa kompyuta husika anapojaribu kuingia mtandaoni, atasalimiwa na blogu ya kiswahili. Hiyo nadhani inaongeza wigo wa blogu zetu.

Nilifanya hivyo pia kwa baadhi ya miji niliyopita mwaka huu. Nadhani inasaidia kuzitangaza blogu.

Ukweli ni kwamba bado matumizi ya mtandao yamekuwa zaidi katika kuandikiana barua pepe na mambo yetu yaleee niliyoyasimulia juzi. Hata ivyo naamini mabadiliko hata kama yanaonekana kwenda taratibu, bado yanakuja. Ni wajibu wetu kuyachochea.

Leo nimekuja kwenye cafe nyingine. Hii kidogo iko wazi sio kama ile iliyokuwa imefunikwa gubi gubi. Kuna jamaa hapa tumekaa karibu. Ananicheki nafanya nini. Kazi kweli kweli. Na inaonekana anasoma kila ninachofanya. Anatabasamu mwenyewe. Nahisi kasoma sentensi hizi za kumsemea kwa wasomaji wangu. Anatingisha kichwa sasa hivi. Nadhani ananishangaa. Ananiangalia kwa kuibia bia. Nadhani ana maswali mengi kuliko majibu. Tuachane naye.

Miaka ya nyuma nikiwa kidato cha kwanza na pili mjini hapa nilikuwa na rafiki yangu wa muhimu sana. Rama. Rama alikuwa muuza magazeti mitaa ya Posta. Urafiki wetu na Rama ulikuwa na sababu. Sababu yenyewe ni kwamba kila siku ningeweza kwenda kwa Rama Magazeti na angeniruhusu kusoma magazeti yote ya siku hiyo. Enzi hizo nilikuwa msomaji mzuri sana wa magazeti japo sikuwa na uwezo wa kuyanunua. Niliweza kumudu kununua moja tu la wiki: Rai. Rai enzi hizo bwana halikuwa mchezo. Nikiwa nyumbani jana nilipekuwa pekua maktaba ya magazeti hayo. Rai limebadilika sana siku hizi. Kuna tofauti kubwa mno ya magazeti ya Rai enzi za nguvu ya Hoja na haya ya siku hizi. Ndio maana sishangai siku hizi watu wengi wameachana nalo. Nini kimetokea?

Basi. Rama nimemtafuta simwoni. Naambiwa siku hizi kaamua kufanya mambo mengine. Hauzi tena magazeti. Sina namba yake. Sina jinsi ya kumpata. Basi sikuwa na la kufanya. Rafiki yangu Rama aliyenipa ofa za kusoma magezeti kaachana na kazi ya kuuza habari, anafanya kazi gazi siku hizi? Bila yeye nadhani kiu yangu ya kusoma soma viandikwa ingefifia kama sio kupotea kabisa.

Naandika kuwashukuru wauza magazeti. Urafiki na watu hawa umenifunza mengi. Japo wengi wao hawasomi wanachouza, lakini kule kuwa wakarimu kwa wauziwaji kunawasaidia. Mimi sikuwa muuziwaji. Nilikuwa ombaomba wa nisicholipia. Nawaheshimu sana watu kama akina Rama. Kumbe kila anachofanya mtu kina nafasi yake katika jamii. Jamii ina watu tofauti tofauti. Wenye uwezo tofauti tofauti. Wenye matakwa tofauti tofauti. Wenye maoni tofauti tofauti. Kumbe ni kwa sababu ya tofauti hizo, tunazo sababu za kutosha kutegemeana na tushirikiana. Tukishirikiana tutafaidiana. Kwa nini tusiheshimiane?

Maoni

  1. Fadhy Mtanga27/12/08 1:16 PM

    Kaka ahsante sana. Umenikumbusha zamani wakati nikisoma. Nilikuwa msomaji mzuri wa hilo gazeti. Lilikuwa moto kweli kweli, sijui nini kilichotokea.
    Siku hizi hata silitamani, blog zinanitosha kupata ninachokihitaji.
    Nakushukuru kwa kazi nzuri uloifanya huko Singapore (Singida) kazi nzuri.
    Kuna rafiki yangu huko aitwaye Balthazar Nkhangaa.
    Napenda kukutakia kila la kheri katika mambo yako.
    Wikend njema.

    JibuFuta
  2. Mzee wa Changamoto27/12/08 2:10 PM

    Huwa sitamani siku ya kuhojiwa niwataje walionisaidia kufika hapa nilipo. Amini usiamini, kama ukikaa chini na kuwaza kwa undani utagundua kuwa takribani kila aliyeshiriki maisha yako ana mchango. Nazungumzia hata wale waliokuudhi na ambao ulitaka kuwadhihirishia kuwa hawako sahihi ama wewe ni zaidi yao na kufanya maamuzi ambayo yamekunyanyua harakaharaka. Unadhani hawa hawastahili shukrani? Kuna mengi na wengi wa kushukuru na nikiambiwa nifanye hivyo ntasema kwa ujumla tu (ukiachilia ndugu wa karibu kama Baba, Mama, Dada, Kaka) maana wakati mwingine waweza kuchelewa basi kwa kuwa dereva kawahi kuondoka, na wakati unasubiri lifuatalo ukaonana na mtu ama baada ya kupanda la pili ukaongea na mtu ambaye atakupa "mchongo" unaoweza kubadili maisha yako. Unadhani utakumbuka kumshukuru yule dereva aliyekuacha? Lakini ni kweli kuwa kukuacha kwake kumebadili maisha yako? Wale walioachwa na Mv Bukoba wakawa wanalia kisha wakasikia kilichotokea wakati wanakaribia Mwanza unadhani walishukuru kuachwa? Ukiangalia sana, kila mtu ana nafasi yake kwenye maisha. Awe anasifia ama anakosoa. Tatizo ni namna tuamuavyo kuchukulia mahusiano yetu na wenzetu.
    Salamu kwa Rama ukimuona. Mwambie alichokirutubisha ndicho kitufanyacho tu-JIELEWE sasa

    JibuFuta
  3. MARKUS MPANGALA8/1/09 11:56 AM

    Duu kuhusu gazeti ni kweli lakini je niwaambie kilichotokea? aisehee mtanilinda kweli? au mnaleta urani kazi kwelikweli

    JibuFuta

Chapisha Maoni

Zilisomwa zaidi wiki hii...

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Tumia Mbinu Hizi Kuelewa Unachokisoma -3

Picha
PICHA: thesouthern.com Siku moja nikiwa kwenye maktaba ya Chuo Kikuu cha Dar es Salaam, wanafunzi wa shahada za awali waliingia kufanya mtihani wa muhula wa mwisho wa masomo. Wakati wanaingia, mmoja wao alijigamba kwamba hiyo ndiyo ilikuwa mara yake ya kwanza kukanyaga maktaba tangu amejiunga na chuo hicho miaka mitatu iliyopita. Nilishangaa inawezekanaje mwanafunzi wa chuo kikuu kujisifia jambo la fedheha kama hilo.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi...
Soma zaidi »»

Ukuaji wa Kiakili na Kimwili kwa Mtoto wa Miaka 0 – 3

Picha
Katika makala haya, tunatazama kwa ufupi makuzi ya mtoto mwenye umri wa siku moja mpaka miezi 36. Tutaangalia mambo ya msingi yanayonesha ukuaji wa mtoto unavyoendelea katika maeneo makubwa manne; 1) ukuaji wa kimwili 2)  kiakili 3)  kimahusino na watu wengine na mwisho 4) kihisia. Kwa kawaida maeneo haya manne yanategemeana ili kumwezesha mtoto kukua kwa ujumla. Kwa mfano ili mtoto akue kimwili, anahitaji ukuaji wa akili ipasavyo ambayo nayo itaathiri namna anavyomudu hisia zake na hivyo kuhusiana na watu wengine. Kwa hiyo ni sawa tukisema hakuna ukuaji wa eneo moja usiotegemea eneo jingine.
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye ...
Soma zaidi »»