Kwa Nini Tunapenda Kusikia Habari Mbaya?

Umewahi kujiuliza kwa nini habari tunazofuatilia kwenye vyombo vya habari mara nyingi ni matukio mabaya? Kwamba ili iwe habari yenye kuvutia watu wengi mara nyingi hulazimu iwe habari ya jambo lisilotarajiwa. Kwa mfano, habari za mbunge kulala wakati kikao cha bunge kikiendelea inaweza kuwa na mvuto kuliko habari ya namna mbunge huyo huyo alivyotekeleza wajibu wake kabla ya ‘kupitiwa na usingizi.’
Kadhalika, matukio yasiyofurahisha huwa yana nguvu kubwa ya kufunika mazuri mengi tuliyowahi kukutana nayo. Ni rahisi, kwa mfano, unaporudi nyumbani ukajikuta ukielezea tukio moja baya ulilokutana nalo kazini kuliko mambo mazuri uliyokutana nayo siku hiyo. Tukio la mfanyakazi mmoja kukukosea, linakaa kichwani zaidi kuliko mazuri mengine yote uliyokutana nayo.

Si hivyo tu. Hata tunaposikia mambo ya wengine, tunavutwa kusikia habari hasi (mbaya) kuliko habari zao njema. Ukisikia mtu fulani amefanya kosa fulani, ni rahisi kuvutiwa kujua kulikoni, kuliko pale unaposikia mtu huyo huyo amefanya vizuri. Huu ni ukweli usiopendeza wa maisha yetu ya kila siku. Kwa nini inakuwa kama vile fahamu zetu zinatafuta kujua mabaya kuliko mazuri?

Hofu ya Yasiyotarajiwa

Hofu ndiyo sababu kubwa inayotufanya tuvutwe na mabaya yasiyotarajiwa. Linapotokea tetemeko la ardhi, kwa mfano, ni rahisi tukio hilo baya kufuatiliwa kwa karibu na watu kwa sababu si tukio lililotarajiwa na kwa kweli linatishia uhai wetu. Kwa kawaida, mambo yanayotishia uhai wa mwanadamu ni yale hasi na ndiyo hayo tunayoyafuatilia kwa karibu ili tuweze kujihami na madhara yanayoweza kutupata siku zijazo. Tunafuatilia mambo mabaya kujilinda na uwezekano wa madhara.
Vilevile, hofu ya kushindwa kufikia malengo yetu hutufanya tuguswe na matukio machache tusiyoyatarajia pengine kuliko mafanikio mengi tuliyonayo. Kukemewa na bosi, kwa mfano, hujenga hofu ya kupoteza hadhi yako, jambo ambalo, katika hali ya kawaida, usingependa litokee. Ili kufanikiwa kazini, unaamini unahitaji hadhi fulani.

Huzuni kwa kiasi kikubwa huchangiwa na mazoea yetu ya kutarajia mabaya PICHA: blackprssusa.com 

Shauri ya hofu hiyo ya kupoteza hadhi waweza kujikuta ukichukulia kwa umaanani karipio hilo kuliko hata pale unaposifiwa na kila mtu ofisini kwako.  Katika mazingira hayo, hofu ya kupoteza ulichonacho inakufanya upuuze sifa nyingi ulizonazo kwa sababu tu umechukulia kwa uzito yale unayohisi yanahatarisha kupoteza heshima/hadhi yako.

Kadhalika, wakati mwingine tunapenda habari mbaya za wengine kwa sababu ya kushindana sisi kwa sisi. Kwa kawaida unaposhindana unatamani wale unaoshindana nao washindwe. Kwa hiyo tunapokuwa watu wa mashindano ni rahisi kujawa hofu ya kushindwa pale tunaposikia mazuri yao na hivyo tunavutwa zaidi na habari zao hasi kuliko yale mazuri wanayoyafanya. Mabaya yao yanatufanya tuwaone kama watu wanaoelekea kushindwa.


Athari za Kutarajia Mabaya

Mwanadamu anahitaji kiwango fulani cha hofu ili aendelee kujibidiisha kufikia malengo yake. Pasipo hofu, huenda tusiweze kuwa na nguvu ya kuwa waangalifu katika mambo yetu. Mwanafunzi, kwa mfano, anahitaji kuwa na kiwango fulani cha hofu ya kuanguka katika mtihani ili aweze kusoma kwa bidii. Bila hofu atajiamini kupindukia na hatasoma. Matokeo yake yanaweza kuwa mabaya.


Kijana anayetaka kuanzisha familia anahitaji kiwango fulani cha hofu ili awe mwangalifu katika maamuzi yake. Mfanyakazi naye, hali kadhalika, anahitaji hofu ya kufutwa kazi ili afanye kazi kwa bidii na kujituma. Maana yake ni kwamba kwa namna fulani tunahitaji hofu kama motisha ya maisha. Na kama tunahitaji hofu, kwa namna fulani ni muhimu kutarajia mabaya ili kuchukua hatua stahiki kabla mabaya hayo hayajajitokeza. 

Hata hivyo, hofu inapozidi kiwango, ni hatari. Hutufanya tukose nishati ya kujiamini. Ndio kusema, hofu inayotusababisha tufuatilie sana mambo hasi yaweza kuwa sumu katika fikra zetu na yaweza kuwa nishati ya kuturudisha kwa mwendo wa kinyume nyume. 

Ni kweli kufuatilia sana mambo mabaya yaweza kuonekana kuwa jambo la kawaida. Kama tulivyoona, mara nyingi ndivyo ilivyo. Akili zetu zina kawaida ya kupekua mambo mabaya. Tunayatafuta. 

Pamoja na hayo, upo ukweli kwamba kwa kiasi kikubwa hisia zetu hutokana na kile tulichokiingiza katika fahamu zetu. Kwa hivyo, mazoea ya kujaza akili zetu taarifa mbaya muda wote hujenga matarajio mabaya yanayoondoa utulivu wa moyo.  Huwezi kuwa na nafsi iliyotulia kwa kutarajia mabaya.

Wakati mwingine tunaweza kujikuta tukikosa amani na furaha katika maisha na tunashindwa kujua kwa nini inakuwa hivyo. Kumbe hofu ambayo wakati mwingine haina msingi wowote huwa tunaijenga sisi wenyewe. Tunajikuta tukikosa amani, tunajawa hasira, tunakata tamaa, tunatarajia mabaya yasiyokuwepo na matokeo yake tunakuwa na msongo wa mawazo usio na sababu. Chanzo cha haya yote ni mazoea ya kufuatilia mabaya yanayotokea.

Tunaweza Kubadili Mazoea Haya

Ingawa ni kweli fahamu zetu zinatuelekeza kutarajia mabaya na wakati mwingine kuyatafuta, tunaweza kabisa kubadili mazoea. Tunaweza kufanya jitihada kujenga upya fikra zetu. Tunaweza kulazimisha fahamu zetu kufikiri mambo chanya hata kama mambo hayo hayatarajiwi.

Kwa mfano, badala ya kutarajia kwamba utaharibu kazi, kwa nini usitarajie utafanya vizuri? Kwa nini iwe rahisi kufikiria kuharibu kazi na kujiongezea hofu inayoweza kuathiri utendaji wako badala ya kufikiria unavyoweza kufanya vizuri?

Kwa nini, kwa mfano, unapotafakari siku yako ilivyokwenda usiilazimishe akili yako kufikiria mazuri uliyokutana nayo siku hiyo hali inayoweza kukuongezea ujasiri na kujiamini badala ya kutafakari mabaya machache yaliyojitokeza?

Tunaweza kabisa kujenga utamaduni mpya mgumu wa kutafuta mambo chanya katika mazingira yetu yanayotuongezea ujasiri wetu badala ya yale hasi yanayotujengea hofu isiyo na sababu. Tunaweza, na kwa kweli, ni muhimu kuyapa nafasi mambo chanya katika fikra zetu ikiwa kweli tutajitambua. 
Soma gazeti la Mtanzania kila Alhamisi kwa mada kama hizi kwenye safu ya Saikolojia.

Maoni

Chapisha Maoni

Zilisomwa zaidi wiki hii...

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi
Soma zaidi »»

Tumia Mbinu Hizi Kuelewa Unachokisoma -3

Picha
PICHA: thesouthern.com Siku moja nikiwa kwenye maktaba ya Chuo Kikuu cha Dar es Salaam, wanafunzi wa shahada za awali waliingia kufanya mtihani wa muhula wa mwisho wa masomo. Wakati wanaingia, mmoja wao alijigamba kwamba hiyo ndiyo ilikuwa mara yake ya kwanza kukanyaga maktaba tangu amejiunga na chuo hicho miaka mitatu iliyopita. Nilishangaa inawezekanaje mwanafunzi wa chuo kikuu kujisifia jambo la fedheha kama hilo.
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye
Soma zaidi »»

Zijue Tabia Nne za Kiongozi Bora Kazini

Picha
Ufanisi kazini, kwa kiasi kikubwa, unategemea uwezo alionao kiongozi. Huyu ni mtu mwenye mamlaka yanayompa sauti ya kuhamasisha watu kujiwekea dira na utaratibu wa kuifikia dira hiyo. Kiongozi anatambulishwa na uwezo wake wa kuwavuta na kuwashawishi watu makini kutumia vipawa , ujuzi na uzoefu walionao katika kuwezesha kufikia malengo mapana ya kampuni, taasisi au kikundi husika.
Soma zaidi »»

Tabia za Mtoto wa Miaka 0 – 3 Kimahusiano na Kihisia

Katika makala yaliyopita , tuliangalia matukio muhimu ya kimakuzi katika maeneo mawili makubwa ya ukuaji wa mtoto nayo ni 1) kimwili na 2) kiakili. Katika sehemu hii ya pili, tunasaili ukuaji wa kimahusiano na kihisia ili kutazama yabia zinazojitokeza pasipo kuathiriwa na malezi na haiba ya wazazi. Kwa lugha nyingine, haya ni matarajio ya mtoto yanayoendana na umri wake bila kuingiliwa na matarajio na yanayofanywa na mzazi kwake.
Soma zaidi »»