Ni usalama wa Taifa au ni ubaguzi wa rangi?

Tuko ndani ya uwanja wa ndege wa Sao Paulo, Brazil. Ni usiku, tunangoja usafiri wa kwenda Dubai, kama lisaa limoja lijalo. Nimekamata kitabu changu nasoma. Ni kitabu cha rafiki yangu kanigawia nionje yaliyomo. Yeye naye kakaa zake kimya anasoma kitabu changu pia. Saa nyingine tunafunika vitabu, tunazungumza mawili matatu, tunaendelea kupekua pekua. Ni katika kuongoja tu usafiri.

Faizul, Deo, Bijoy, na mimi jijini Sao Paulo. Picha: Dr Awab

Mara wanatufuata watu wawili waliovaa kiraia.
Mmoja kajazia, kajichora tatuu mkononi, kavaa viatu vinavyompyaya. Mtu wa mazoezi. Mwingine mdogo dogo tu, ila shida yake hasemi kiingereza. Kwa hiyo ni "mpole fulani hivi".

Baunsa anatuonesha kitambulisho chake. Ni askari wa Kibrazil.
"Ninaomba kuona hati yako ya kusafiria tafadhali?"askari bonge ananiambia, mwenzie akimsaidia kwa macho. Nilisita kidogo, nikijiuliza inakuwaje aje kwangu wakati nilikuwa na wasafiri wengine. Ndicho nilichomwuliza. Baada ya kudai kuwa anafanya hivyo akilinda taifa lake, sikuona sababu ya kubishana. Najua dunia inatishwa siku hizi. Ugaidi, madawa ya kulevya na mambo kama hayo. Kwa hiyo nikawapatia hati yangu bila tabu.
Baada ya kuipekua, mmoja wao (aliyeonekana kujua jua kimombo, yule bonge) akaniuliza maswali kadhaa ambayo bila shaka lengo lake likiwa ni kujua nimekuwa Brazil kwa muda gani, kwa sababu gani, naondoka saa ngapi na bla blaa. Tuliwapatia ushirikiano wa kutosha. Basi wakanirudishia hati yangu na kuondoka.

Sie tukaendelea na hamsini zetu, kwa kujadili tukio hili. Mjadala wenyewe ukiwa ni iwapo tendo hili linazo chembe za ubaguzi wa rangi ndani yake.

Baada ya kama dakika kumi hivi, wale jamaa wakarudi tena tulikokuwa tumekaa, safari hii wakitokea kwenye sehemu ya ukaguzi (getini) ambako tungekaguliwa kama lisaa limoja lijalo.
"Mista, una mzigo wowote unaosafiri nao?" Jamaa niliyekuwa naye, akawaondolea uvivu. "Mbona mmerudi tena kama watu wenye mashaka na sisi? Tuambieni sababu…hali hii inaweza kutufanya tushindwe kukaa vizuri na abiria wenzetu…"

Jamaa wakadai wamekuwa wakitusoma na kwamba tunaonekana kupanga kitu wasichokijua. Na kwamba walipokuja tuliwatazama kwa macho yasiyoeleweka.

"Mnatufanyia hivi kwa sababu ya rangi zetu?" akahoji mwuungana mwenzangu huku akiweka kitabu kwenye kiti pembeni.
"Hapana. Ninafanya hivi kulinda nchi yangu" kakasirika kidogo, makunyanzi yanaonekana usoni mwake. Du kajazia, anatisha.
"Sasa kama ni kulinda nchi yako, kwa nini mmetufuata sisi moja kwa moja tena mara mbili na sio hawa wenzetu…nieleze?" Swahiba wangu kapandwa na hasira na yeye.
"…ninachofanya ni kazi yangu...kuilinda nchi yangu"
"Hebu twende huku…" amri yenye mfano wa ombi.

Haya. Mguu kwa mguu wa mkaguzi.
Wakaongea kilugha chao huku kompyuta ikisumbuliwa, kilugha tena, hati yangu inaendelea kutazamwa na wale jamaa "wanaolinda nchi yao". Yule dada anawajibu kilugha, sielewi, ila ni kama anawahihishia kwamba "huyu dogo ni dakika chache anaondoka zake"
"Nashukuru, hakuna tabu tena." askari akadai huku akinirudishia hati yangu.
"Tafadhali naomba kujua shida ni nini hasa?" nauliza nikiwa na hasira. Unajua saa nyingine si vizuri kuzungumza ukiwa na ghadhabu kama niliyokuwa nayo.
"Yameisha Mista…tafadhali endelea na shughuli zako"
Sioneshi kuridhika na majibu yake. Narudia swali lile lile. Shida hasa ilikuwa nini?
"Tulikuwa na wasiwasi na jina lako. Tulidhani ni la kike…na wewe mwenyewe ni mwanaume, kwa hiyo hatuk…." akajibu askari aliyejazia.

Basi bwana. Nikaona ya nini kubashana na watu bwana. Mie hapa naondoka saa moja ijayo nawaachia nchi yao.

Moyoni nikiwaza: Hivi huu ni usalama wa Taifa au ni ubaguzi wa rangi? Ni rangi ya ngozi yangu ndiyo inayoleta mashaka? Au ni "taratibu zetu za kulinda watu wetu"?

Hata hivyo, hiyo haikufanya nihitimishe hoja ya ubaguzi wa rangi. Labda wewe msomaji utanisaidia kulijua hili kama umewahi kuishi Brazil na hasa hasa Sao Paulo. Hii ndiyo Brazil.

Maoni

  1. Fadhy Mtanga26/5/10 7:20 PM

    Kaka kwanza niseme pole kwa usumbufu huo.

    Lakini pia nadhani umepata nafasi ya kuwafahamu watu wa upande mwingine wapoje. Suala la ubaguzi tumewahi kulijadili sana. Lakini ubaguzi ni ubaguzi tu.

    JibuFuta
  2. Faustine26/5/10 11:25 PM

    Pole sana kwa yaliyokusibu..

    JibuFuta
  3. Simon Kitururu27/5/10 3:15 PM

    Pole Mkuu! Sijawahi kufika Sao ila navyofahamu pamoja nakuwa wanawatu weusi ubaguzi upo Brazil.

    Freddy Macha angeweza kusaidia kwa hili kwakuwa kawahi kukaa hapo mtaani.

    JibuFuta
  4. Bila jina27/5/10 4:19 PM

    tena ukiendelea kubishana au ukionyesha hasira ndio wanahakikisha kuwa una njama. ukiwa umevaa hii jezi nyeusi halafu unaonekana kijana inaweza kuwa tabu.

    JibuFuta
  5. Maisara Wastara27/5/10 4:21 PM

    Pole mwayego....wanasema msafiri kafiri

    JibuFuta
  6. Godwin Habib Meghji27/5/10 5:15 PM

    Mambo mengine yanachangiwa zaidi na historia. sina uhakika kama ndio huo tunaita ubaguzi wa rangi. KWA MFANO HATA NYUMBANI AKIPITA KIJANA ALIYEVAA KIAJABU AJABU(nadhani unanielewa) KATIKA MITAA YENU, LAZIMA UTAANZA KUJIULIZA USALAMA WA VITU VYAKO. Kwa sababu tu vibaka wengi wanavaa na kuonekana katika muonekano huo.

    Biashara ya kusafirisha madawa ya kulevya Brazili ni maarufu sana. na waafrika wengi wanatumika kusafirisha. INAWEZEKANA PIA IMECHANGIA KWA KUWASHUKU NA SI WATU WENGINE

    Ni sawa na US, matokeo mengi ya ualifu yanafanywa na Blacks. ndio maana polisi wanakuwa na mashaka zaidi na blacks kuliko wazungu. Najua ubaguzi upo. Ila si mara zote wanapofanya kazi nio yao ni ubaguzi moja kwa moja

    JibuFuta
  7. Christian Bwaya27/5/10 9:30 PM

    @ Fadhy, Maistara na Faustine asanteni sana

    @ Mtakatifu, asante kwa dondoo ya Fredy, ndo nimekumbuka kuwa huku palikiwa kwake miaka fulani. Anaweza kuwa anajua zaidi

    @ Anony na Mengji, itabidi tuanze kubadili mitizamo ya hawa jamaa. Isionekane ukiwa mweusi basi lazima uwe suspected

    JibuFuta
  8. Egidio Ndabagoye31/5/10 9:54 AM

    Pole sana.Mlikuwa mnaonekana kupanga vitu wasivyovijua?Mngekuwa mmefuga madevu msingondoka hapo.

    JibuFuta
  9. Christian Bwaya31/5/10 6:20 PM

    Edigio umenichekesha. Karibu sana baada ya kimya cha muda mrefu.

    JibuFuta
  10. Sophie5/6/10 3:41 AM

    Kaka Bwaya pole sana. Mie ninamtizamo tofauti nafikiri ni watu wanalinda nchi yao na siyo ubaguzi wa rangi .Kazi yao ndivyo ilivyo inahusisha kukagua na kuuliza maswali.Tutaendelea kukutana na matukio haya safarini muhimu ni kukumbuka kuwa dunia imebadilika umdhaniaye siye ndiye.Kwa ufupi si ubaguzi ila kazi yao ndiyo inavyofanyika na ni kwa usalama wa wasafiri.

    JibuFuta
  11. Bila jina8/7/10 2:04 AM

    Brazili elite wengi ni watu Weupe ambao wametokana na Walowezi Weupe na wana damu ya kibaguzi sana watu weusi bado hata leo Brazil wanabaguliwa, NA NI KITU KAMA KIMEJENGEKA MAMBO YOTE YA KIHUNI HUFANYWA NA WEUSI TOKA WIZI, UJAMBAZI NA MADAWA YA KULEVYA, NA WANAFANYA HIVYO KUTOKANA NA KUKOSA NAFASI KATIKA JAMII

    JibuFuta

Chapisha Maoni

Zilisomwa zaidi wiki hii...

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi
Soma zaidi »»

Tumia Mbinu Hizi Kuelewa Unachokisoma -3

Picha
PICHA: thesouthern.com Siku moja nikiwa kwenye maktaba ya Chuo Kikuu cha Dar es Salaam, wanafunzi wa shahada za awali waliingia kufanya mtihani wa muhula wa mwisho wa masomo. Wakati wanaingia, mmoja wao alijigamba kwamba hiyo ndiyo ilikuwa mara yake ya kwanza kukanyaga maktaba tangu amejiunga na chuo hicho miaka mitatu iliyopita. Nilishangaa inawezekanaje mwanafunzi wa chuo kikuu kujisifia jambo la fedheha kama hilo.
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye
Soma zaidi »»

Zijue Tabia Nne za Kiongozi Bora Kazini

Picha
Ufanisi kazini, kwa kiasi kikubwa, unategemea uwezo alionao kiongozi. Huyu ni mtu mwenye mamlaka yanayompa sauti ya kuhamasisha watu kujiwekea dira na utaratibu wa kuifikia dira hiyo. Kiongozi anatambulishwa na uwezo wake wa kuwavuta na kuwashawishi watu makini kutumia vipawa , ujuzi na uzoefu walionao katika kuwezesha kufikia malengo mapana ya kampuni, taasisi au kikundi husika.
Soma zaidi »»

Tabia za Mtoto wa Miaka 0 – 3 Kimahusiano na Kihisia

Katika makala yaliyopita , tuliangalia matukio muhimu ya kimakuzi katika maeneo mawili makubwa ya ukuaji wa mtoto nayo ni 1) kimwili na 2) kiakili. Katika sehemu hii ya pili, tunasaili ukuaji wa kimahusiano na kihisia ili kutazama yabia zinazojitokeza pasipo kuathiriwa na malezi na haiba ya wazazi. Kwa lugha nyingine, haya ni matarajio ya mtoto yanayoendana na umri wake bila kuingiliwa na matarajio na yanayofanywa na mzazi kwake.
Soma zaidi »»