Usiyempenda anaweza kuwa baba wa mwanao?

 


Watoto wanahitaji uwepo wa mzazi. Simulizi la Slaquara lilitukumbusha hakuna muujiza kwenye malezi. Mzazi unavuna ulichopanda. Renee anakazia funzo hilo. “Umeongelea athari za umbali kati ya mzazi na mwanae. Nayajua maumivu yake,” anasita na kufafanua, “Sikumbuki lini niliongea na mama yangu. Siwezi kusema ni adui yangu lakini sio mtu naweza kumtegemea kwa lolote.”

 

“Mara ya mwisho kuonana naye ni miaka miwili iliyopita alipokuja kusuluhisha mgogoro wangu na mzazi mwenzangu,” leso anayoitumia kujifutia inalowa machozi. Renee anaikunjua na kuigeuza kutafuta penye ukavu. “Nilimpa nafasi ya pili akaitumia vibaya. Badala ya kusikiliza upande wangu anielewe, aling’ang’ania kuwa upande wa yule mwanaume akinilazimisha kuishi naye. Hakutaka kabisa kuelewa kwa nini nilichagua abaki kuwa mzazi mwenzangu na si zaidi ya hapo.”

 

Mgororo huu mkubwa wa mzazi na mwanae umeanzia wapi? Renee anasimulia, “Nimekuzwa kama mtoto yatima. Nasimuliwa baba alipofariki nikiwa mdogo sana, mama alinipeleka kwa shangazi. Shangazi alipambana kuhakikisha ninasoma na kupata mahitaji yangu. Lakini kilichonisumbua ni yale maumivu ya kumkosa baba. Kilichokuwa kinauma zaidi mama nilijua yupo lakini sikujua yuko wapi. Shangazi labda alilinda hisia zangu kwa hiyo hakuwahi kunipa majibu yanayoeleweka zaidi ya kuniambia anaishi Mwanza aliko bibi.”

 

Mazungumzo yetu na Renee yanageuka kuwa maombolezo. Kashikilia leso aliyoigeuza pande zote na bado imelowa machozi, “Usiombe hiyo hali ya mtoto unamhitaji mzazi wako usiyejua yuko wapi.”

“Nilisoma bweni shule ya masista. Kuna ule upweke unapoona wenzako wanatembelewa na wazazi wao. Siku moja kama kichaa nilitoroka nyumbani nikapanda basi niende Mwanza.” Renee hakuwa mkubwa kivile. Mtoto wa shule ya msingi. Nauli ni hela aliyokuwa anaficha kidogo kidogo. Taarifa kubwa iliyomwongoza ni kazini kwa bibi. “Nilifika ofisini saa za jioni. Nikauliza. Labda kwa ule mshangao wa kuona mtoto mdogo nimetoka Dodoma kuja kumtafuta bibi Mwanza watu walinisaidia. Baada ya kuhangaika sana nikampata.”

 

“Bibi aliponiona aliangua kilio. Hatukuwa tumeonana miaka mingi lakini ninafanana sana na mama. Basi kesho yake bibi akanipeleka kwa mama. Furaha isiyo kifani kumwona mama yangu mzazi.”

 

Kilichomshangaza Renee ni mama kutokuonekana kujali. Hakuwa na ule msisimko wa kuonana na mwanae. “Nimekaa naye kama mwezi lakini nilianza kuhisi kuna tatizo. Nilijiuliza maswali mengi. Labda mama na baba walikuwa na ugomvi. Nilijiona kama sihitajiki kwenye maisha ya mama yangu.”

 

Renee anayakumbuka maisha ya utoto wenye upweke. Hakuwa na mtu wa karibu kumsikiliza. Balehe ilimvamia hajajiandaa. Hakuwa na mtu mzima wa kumfunda zaidi ya marafiki rika ambao nao hawakuwa wanajitambua.

 

Kupitia marafiki Renee alikutana na mwanaume asiyemfahamu sana. Ombwe la kueleweka likawa kama limejazwa. Mara ya kwanza Renee anakutana na mtu ‘anayempenda’ na ‘kumjali.’ Hasimulii mengi lakini anaonekana kufurahia kipande hicho cha maisha yake. Lahaula. Msisimuko unageuka shubiri. Renee ana mtoto na mwanaume mtu mzima. Mambo mengi hapa Renee anasita kunisimulia lakini baadae anagundua mtu pekee aliyemwamini tayari alikuwa na familia yake. Je, akubali nafasi ya uke wenza? Kesi inatua kwa mama.


“Kuolewa siku hizi ni bahati. Olewa na mwanaume huyu mwanangu. Nani atakubali aibu ya wewe kuwa mama asiye na mume?” Renee anakumbuka wosia wa mama. “Ushauri huu unatoka kwa nani?” Renee anauliza na kujijibu, “Si huyu mama aliyenipuuza kwa miaka yote? Huu ushauri ‘mzuri’ unaotolewa leo ni kwa ajili yangu au basi mama anataka kunitumia kwa faida yake?”


Renee amefanya maamuzi. Harudi nyuma. Hatakubali kuolewa na mwanaume tapeli. Lakini vipi uhusiano wa mwanaume huyo na mwanae umekaaje? Maelezo marefu. Ninakumbuka alivyomalizia, “Nafahamu maumivu ya kumkosa baba. Huyu jamaa ameniumiza sana na sitakaa nimsamehe. Lakini, kwa mazungumzo haya, kitu siwezi kuendelea kufanya ni kumnyima mwanangu haki ya kuwa na baba yake. Natafuta msaada wa namna ya kutenganisha maisha yangu binafsi na hitaji la mwanangu la kuwa na baba yake.” Renee anafikiria namna mtu asiyempenda anavyoweza kuwa baba wa mwanae.


Niandikie: bwaya@learninginspire.co.tz 

Maoni

  1. Bila jina4/12/22 8:37 AM

    Binafsi nimekuwa natamani kutoka katika changamoto hii lakini naona si rahisi, watoto kukua bila wazazi wetu ni janga hatari sana kwa kizazi hiki.
    Kuna muda naona ni bora kuwa yatima kuliko kuwa na wazazi kivuli na ambao hujui kama wanakufikiria au wapo busy na familia zao nyingine.

    JibuFuta

Chapisha Maoni

Zilisomwa zaidi wiki hii...

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi
Soma zaidi »»

Tumia Mbinu Hizi Kuelewa Unachokisoma -3

Picha
PICHA: thesouthern.com Siku moja nikiwa kwenye maktaba ya Chuo Kikuu cha Dar es Salaam, wanafunzi wa shahada za awali waliingia kufanya mtihani wa muhula wa mwisho wa masomo. Wakati wanaingia, mmoja wao alijigamba kwamba hiyo ndiyo ilikuwa mara yake ya kwanza kukanyaga maktaba tangu amejiunga na chuo hicho miaka mitatu iliyopita. Nilishangaa inawezekanaje mwanafunzi wa chuo kikuu kujisifia jambo la fedheha kama hilo.
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye
Soma zaidi »»

Zijue Tabia Nne za Kiongozi Bora Kazini

Picha
Ufanisi kazini, kwa kiasi kikubwa, unategemea uwezo alionao kiongozi. Huyu ni mtu mwenye mamlaka yanayompa sauti ya kuhamasisha watu kujiwekea dira na utaratibu wa kuifikia dira hiyo. Kiongozi anatambulishwa na uwezo wake wa kuwavuta na kuwashawishi watu makini kutumia vipawa , ujuzi na uzoefu walionao katika kuwezesha kufikia malengo mapana ya kampuni, taasisi au kikundi husika.
Soma zaidi »»

Tabia za Mtoto wa Miaka 0 – 3 Kimahusiano na Kihisia

Katika makala yaliyopita , tuliangalia matukio muhimu ya kimakuzi katika maeneo mawili makubwa ya ukuaji wa mtoto nayo ni 1) kimwili na 2) kiakili. Katika sehemu hii ya pili, tunasaili ukuaji wa kimahusiano na kihisia ili kutazama yabia zinazojitokeza pasipo kuathiriwa na malezi na haiba ya wazazi. Kwa lugha nyingine, haya ni matarajio ya mtoto yanayoendana na umri wake bila kuingiliwa na matarajio na yanayofanywa na mzazi kwake.
Soma zaidi »»