Hivi ni laana ama ni mdudu gani?

Niliwahi kumsikia "mwinjilisti" mmoja aliyekuwa akichapa injili mitaa ya Kariakoo. Siku hizi ni jambo la kawaida kukuta watumishi hawa wanaoitwa wa Mungu wakifanya "vitu vyao" hadharani bila kujali haki za wengine. Kelele nyiiiingi kisa wanasema habari za Mungu. Kwa hiyo kimsingi haikunishangaza.

Huyu bwana alikuwa "siriaz" kweli na kazi yake kiasi kwamba ungemhurumia kumwona akisema na watu wasiomsikiliza wala kujali anachosema. Jua lilikuwa kali na alikuwa kavaa koti zito. Joto la Dasalama tunalijua. Japo sikumsikiliza, nilihisi kazi yake ilikuwa ni "kuwarejesha kondoo katika zizi la Bwana".

"Afrika na watu wake, imelaaniwa!" alipayuka huyu bwana huku akitembea kwa madaha. Akageuka huku na kule, akanyanyua biblia yake kuuuuubwa akaendelea: "Enyi uzao wa Hamu, mmelaaniwa na laana yenu inakaa!".

Kwangu mimi maneno haya yalininyong'onyeza mithili ya mtu aliyenyeshewa mvua. "Hivi anajivunia nini kusema maneno haya? Hata kama ndivyo anavyoamini, hivi maneno haya yanamsaidia vipi kuwarejeza kondoo anaowapayukia juani?". Nilijisemea moyoni. Hata hivyo, niliondoka tu kwa shinikizo la niliyekuwa naye.

Hiyo ilikuwa changamoto kwangu, maana ilibidi kuirejea biblia kusoma "upuuzi" wa huyu bwana. Na kwa kweli katika Kitabu cha mwanzo 9:24-27 nilikutana na maneno hayo. Kisa kinaelezwa kwamba wakati Nuhu amelewa, mwanaye mmoja aitwaye Hamu alimwona akiwa uchi, akawaambia nduguze. Ikawa hao ndugu zake waliposikia hayo wakaenda kinyume nyume wakaufunika uchi wa baba yao, hawakuuona. Biblia inaandika kwamba Nuhu alipozinduka na kusikia kuwa Hamu "alimchungulia" akamwaga radhi. Hamu akawa amelaaniwa.

Kifungu hiki katika biblia kilinichanganya na kuna mambo kadhaa yalinishangaza. Kwanza, iweje Nuhu amlaaani mtu ambaye (naamini) aliuona uchi wake kwa bahati mbaya? Maana akili yangu inanituma kuwa Hamu ndiye alikuwa wa kubariki. Maana alipouona uchi wa babaye kwa bahati mbaya alichukua hatua ya kuwaambia nduguze ambao ndio walimfunika. Kosa la Hamu ni nini? Iweje alaaniwe kwa sababu ya bahati mbaya?

Lakini vilevile nashindwa kuelewa iweje Hamu ndiye awe Mwafrika? Imeandikwa wapi mbona katika biblia sioni popote panapothibitisha hilo? Hapo sijajua sana.

Hata hivyo katika kutafakari, kuna mambo ambayo pia yanaweza kuwa ni uthibitisho wa madai haya. Hivi kwa nini waafrika tuko nyuma namna hii? Naambiwa na waliosoma historia kwamba tuliwahi kuwa katika fungu moja na watu weupe (Sitaki kuwaita wazungu maana ni kuwatukuza wawe sawa na Mungu). Kwa nini wametuzidi? Zinatolewa sababu nyingi. Oooo, mapinduzi ya viwanda sijui teknolojia sijui nini...waaaapi bwana, tulishindwa nini na sisi kuwa na yayo hayo?

Tunaambiwa tuliuzwa kama bidhaa. Yaani mtu anakuja anawachukua mpaka Bagamoyo wala hamjiulizi! Mnafika pale mnapigwa bei, kwenu sawa tu! Hivi kama sio laan ni nini?

Simulizi la akina Mangungo wa Msovero ndio buuure kabisa. Unanyeshwa pombe unapokea vijizawadi halafu unatia saini mkataba amabao hata hivyo huulewi! Akili ya wapi hii...mnake kuja kustukia kumbe nchi umeiuza! Kama sio laana ya Nuhu ni nini hii?

Unajua bwna amabo mengine tufikirie. Hivi wewe anakuja mzungu anachimba madini anabebea kila kitu mapaka na mchanga halafu wewe anakuambia atakuachia mrahaba wa asilimia tatu, wala hustuki. Unatia saini! Hivi ni kweli?

Unafuta masomo ya Historia, Uraia na Jiografia kwa wanafunzi wako kisa tu ndio masharti ya mkubwa. Matokeo yake unabaki kuwafundisha watoto mambo ya utandawazi, unayapa kisogo mambo yanayowajengea uzalendo. Na wala sio kwamba huelewi, unajua. Jamani hii nayo siyo laana kweli?

Kuna maeneo mengi ambayo mimi nafikiri kuna hitilafu ambayo si ya kawaida. Nilikuwa nafikiri tabia yetu waafrika ya kuwapapatikia hawa jamaa weupe. Yaani mambo mengine yanachekesha kweli. Waafrika wenzako huwa huna "taim" nao leo kaja "mzungu" unajidai ndio makarimu kuliko wote. Unamtetemeka nini? Au ndio ile laana ya Nuhu kwamb utakuwa mtumwa wa wenzako?

Ndesanjo anapiga kelele sana kuhusu kuitunza historia yetu. Watu tunang'ang'ania mambo ya kizungu zungu...uzungu zungu mwingi kumbe tunatumikia laana ya Nuhu. Eti eeeh? Unabisha? Kiingereza cha nini mashuleni wakati wanaofundishwa hawakielewi? Ukiwauliza mtabishana mpaka kesho. Kumbe watu wanadhani kujua kiingereza ndio kusoma. Hii inaweza kuwa laana! Kabisaaa! Kwamba tuwatumikie hawa jamaa.

Kwa hiyo nasema biblia kusema kweli inachanganya. Mimi hapo sijaelewa. Na anajua nikimwuuliza Mchungaji ntaonekana natimizqa dalili za mwisho wa dunia. Kwamba watu watajifanya kuwa wanajua sana. Naomba kuhitimisha hapa.

Maoni

  1. mwandani19/12/06 2:11 PM

    hadithi ya Hamu ilitumiwa sana na makaburu, ilitumiwa na mabwana wa watumwa marekani nk.

    ukiamini una laana basi umekwisha!
    Kwani si ni katika Biblia hiyo hiyo ambapo Yesu alikuwa akifukuza magonjwa, ibilisi na laana zote?

    JibuFuta
  2. Bila jina17/1/07 4:39 PM

    Huku kuwa nyuma kwa Wafrika, niliwahi kusoma kwamba kumechangiwa kwa kiasi kikubwa na hali ya kijiografia ya Afrika, kwa maana kwamba Muumba aliifanya Afrika isiwe na matatizo ya kijiografia kama baridi kali,majanga ya asili kama mafuriko, vimbunga, matetemeko ya ardhi n.k. Ndio maana hatukuhitaji kujibidiisha kwa lolote kwani maisha yaliweza kwenda bila shida. Ukisikia njaa unaokota matunda mwituni au unawinda wanyama ambao ni wengi, jua likiwa kali sana unakaa chini ya mti, mvua ikinyesha unajificha pangoni. Alimradi maisha yasiyokuwa na taabu. Ikumbukwe kwamba magonjwa kama malaria hayakuwepo wakati huo.
    Je ni kweli kwmba hali hii ndio iliyofanya wenzetu weupe wapate maendeleo makubwa kuliko sisi weusi?

    JibuFuta

Chapisha Maoni

Zilisomwa zaidi wiki hii...

Mambo Yanayoweza Kugusa Moyo wa Mwanamke-1

Picha
WANAUME wengi wanaamini wanawake, kwa kawaida, ‘wanapenda hela.’ Kwamba ukiweza kumhakikishia mwanamke 'uhakika wa kiuchumi' unakuwa umemaliza. Ingawa hatuwezi kupuuza ukweli kuwa uhakika wa 'kiuchumi' ni moja wapo ya mahitaji ya mwanamke, lakini si sahihi kuamini kuwa moyo wa mwanamke unaweza kuthamanishwa kwa fedha. Fikra hizi walizonazo wanaume [kuwa anachokihitaji mwanamke ni fedha] zimeleta matatizo mengi katika mahusiano na ndoa. Kwa mfano, wapo wanaume ambao baada ya kuhakikisha wenzi wao wamepata mahitaji ya msingi, basi wanawatelekeza kihisia. Hali hii husababisha upweke mkubwa kwa wanawake hawa wanaojikuta hawana mtu wa karibu kuwasikiliza isipokuwa vitu.
Soma zaidi »»

Mambo ya Kuzingatia Unapoandika Wasifu wa Kazi (Curriculum Vitae)

Picha
Katika mchakato wa kuomba ajira baada ya kuona tangazo la kazi, mambo matatu ni dhahiri. Mosi, huombi kazi hiyo wewe mwenyewe. Wapo watu wengi wanaoandika maombi na hivyo kuongeza ushindani wa nani atapata. Pili, nyaraka unazotuma kwa mwajiri mtarajiwa ndizo zinazojenga utambulisho wako kabla wewe mwenyewe hujafahamika. Tatu, afisa mwajiri hatatumia muda mrefu kusoma maelezo yako. Katika hali ya kawaida, atatumia dakika moja kuamua ikiwa amevutiwa na maelezo yako ama la.
Soma zaidi »»

Maana ya Saikolojia na Nafasi Yake Katika Jamii -1

Picha
SAIKOLOJIA, neno lililotoholewa kutoka neno la kiingereza psychology, si elimu inayoeleweka sana katika jamii yetu. Asili ya 'psychology' ni neno 'psyche' lenye maana ya nafsi. Katika makala haya, tunasaili kwa ufupi maana ya saikolojia kama taaluma na kuonesha nafasi ya taaluma hiyo ngeni katika jamii yetu katika kutatua matatizo ya kijamii na hivyo kuharakisha juhudi za watu kujiletea maendeleo yetu.
Soma zaidi »»

Haiba ni nini?

Sipendi kutumia kiingereza kwa sababu kwanza ninadhani kiswahili kinanitosha kabisa kuelezea kile ninachotaka kusema. Hata hivyo najua pia matumizi ya kiswahili chetu hayajawa katika kiwango kile kilichokusudiwa. Kuna maneno mengi yasiyoeleweka vizuri katika kiswahili cha kitabuni. Moja wapo ya maneno hayo ni hili ninalolitumia leo hii. Haiba. Pengine niweke msisitizo kwa faida ya wale wasiolifahamu neno hili vizuri. Personality. Wengine wanasema maana ya hichi kinachoitwa personality ni utu kwa kiswahili. Ni bahati mbaya kwamba niliyakimbia masomo ya lugha siku nyingi. Ila nimejiridhisha kwamba haiba ndiyo tafsiri muafaka kabisa. Haiba ni nini? Watu wengine watafikiria tunazungumzia mwonekano wa mtu kimavazi. Lakini haiba ni neno pana zaidi ya mwonekano wa mtu kwa nje. Haiba ni jumla ya tabia za mtu zinazotokana na kile anachofikiri, anachopenda, anavyojichukulia yeye mwenyewe, anavyowachukulia watu wengine na kadhalika. Haya yote hujenga mwonekano wa mtu unaopimika (tabia) kama vi
Soma zaidi »»

Uislamu ulianza lini?

Picha
YAMEKUWEPO madai kwamba Uislam ulianza tangu kuumbwa kwa dunia. Na wapo watu wanaotuaminisha hayo. Ukweli ni kwamba Uislam ulianzishwa na Nabii Muhammad mwaka 622 BK huko Arabia. Kabla yake, dini zilizokuwepo zilikuwa ni Uyuda ambayo ni dini rasmi ya Wayahudi (Judaism) na Ukristo ambayo ni dini ya mataifa wasio Wayahudi ulioanza miaka kadhaa baada ya Yesu kuwa ameondoka mwaka 33BK. Yesu mwenyewe hakuanzisha Ukristo. Alisali katika misikiti ya Wayahudi. Masinagogi. Maelezo haya yana msingi wa kistoria na sio propaganda za kidini. Ndio ni propaganda kwa sababu dini zote zimekuwa na tabia ya kuonyesha kwamba zenyewe ndizo za kweli kuliko dini nyinginezo hata ikibidi kwa kuichezea historia. Na ni bahati mbaya kwamba Dini zimekuwa na tabia ya kufanana ya kuzima uwezo wa waumini wake kuhoji lolote kwa kuwajengea hofu ya kujitafutia laana. Qur’an inatupa maelezo yanayokinzana kuhusu lini hasa Uislamu ulianza. Baadhi ya mistari katika kitabu hicho zinadai kwamba ‘nabii’ Muhammad ndiye
Soma zaidi »»

Tabia za Mtoto wa Miaka 0 – 3 Kimahusiano na Kihisia

Katika makala yaliyopita , tuliangalia matukio muhimu ya kimakuzi katika maeneo mawili makubwa ya ukuaji wa mtoto nayo ni 1) kimwili na 2) kiakili. Katika sehemu hii ya pili, tunasaili ukuaji wa kimahusiano na kihisia ili kutazama yabia zinazojitokeza pasipo kuathiriwa na malezi na haiba ya wazazi. Kwa lugha nyingine, haya ni matarajio ya mtoto yanayoendana na umri wake bila kuingiliwa na matarajio na yanayofanywa na mzazi kwake.
Soma zaidi »»